សូមស្វាគមន៍មកកាន់គេហទំព័រផ្លូវការរបស់មជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម

ជាបឋម ខ្ញុំសូមថ្លែងអំណរគុណយ៉ាងជ្រាលជ្រៅដល់ភាគីពាក់ព័ន្ធទាំងអស់ដែលបានចូលរួមចំណែកក្នុងការបង្កើតមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម (ម.ជ.ម.) រួមមានថ្នាក់ដឹកនាំនៃក្រសួងពាណិជ្ជកម្ម សហគមន៍អ្នកធុរកិច្ច សាជីវកម្មហិរញ្ញវត្ថុអន្តរជាតិ (IFC) ដែលបានឧបត្ថមគាំទ្រដល់វគ្គបណ្ដុះបណ្ដាលដំបូងបង្អស់ អ្នកបណ្ដុះបណ្ដាលដែលពោរពេញដោយបទពិសោធន៍ជាច្រើនរូបមកពីវិទ្យាស្ថានមជ្ឈត្តការសិង្ហបុរី (SIArb) និងមជ្ឈមណ្ឌលមជ្ឈត្តការអន្តរជាតិសិង្ហបុរី (SIAC) ក្រុមប្រឹក្សាប្រតិបត្តិ និងក្រុមការងារនៃអគ្គលេខាធិការដ្ឋានរបស់ម.ជ.ម. ទាំងអតីត និងបច្ចុប្បន្ន ក៏ដូចជាមជ្ឈត្តករទាំងអស់។ បើគ្មានការគាំទ្រ ការលើកទឹកចិត្ត និងការខិតខំប្រឹងប្រែងឥតឈប់ឈររបស់ភាគីពាក់ព័ន្ធទាំងអស់ទេ ម.ជ.ម. ក៏មិនអាចមានវត្តមាន និងឈានមកដល់បច្ចុប្បន្ននេះដែរ។

ម.ជ.ម. បានកើតចេញពីបំណងដែលចង់ពង្រីកវិសាលភាពនៃការប្រើប្រាស់យន្តការដោះស្រាយវិវាទក្រៅប្រព័ន្ធតុលាការនៅកម្ពុជា និងដើម្បីដោះស្រាយវិវាទពាណិជ្ជកម្មក្នុងស្រុក និងអន្តរជាតិដែលកំពុងកើនឡើងគួរឱ្យកត់សម្គាល់ស្របតាមកំណើនសេដ្ឋកិច្ចនៅកម្ពុជា។ ការវិនិយោគបរទេសដើរតួនាទីយ៉ាងសំខាន់ក្នុងការរួមចំណែកដល់កំណើនសេដ្ឋកិច្ច ក៏ដូចជាកំណើននៃប្រតិបត្តិការពាណិជ្ជកម្មឆ្លងព្រំដែនផងដែរ។ អ្វីដែលសហគមន៍អ្នកធុរកិច្ចត្រូវការ គឺសមត្ថភាពដោះស្រាយវិវាទដែលកើតចេញពីប្រតិបត្តិការពាណិជ្ជកម្មទាំងនោះ ប្រកបដោយប្រសិទ្ធភាពតាមរយៈយន្តការដោះស្រាយវិវាទមួយដែលមានលក្ខណៈអព្យាក្រឹត្យ។ យន្តការមួយដែលអាចផ្តល់ឱ្យគូភាគីនូវស្វ័យភាពក្នុងការជ្រើសរើសមធ្យោបាយដោះស្រាយវិវាទ សេរីភាពក្នុងការជ្រើសរើសបុគ្គលត្រឹមត្រូវដែលមានជំនាញបច្ចេកទេសច្បាស់លាស់ក្នុងការធ្វើសេចក្តីសម្រេចលើវិវាទ និងសមត្ថភាពក្នុងការអនុម័តនីតិវិធីណាមួយដែលល្អបំផុតក្នុងការដោះស្រាយវិវាទរបស់គូភាគីដោយផ្អែកលើស្ថានភាពជាក់ស្តែងនៃប្រតិបត្តិការពាណិជ្ជកម្មនីមួយៗ។ សមត្ថភាពដោះស្រាយវិវាទប្រកបដោយទំនុកចិត្ត និងការអនុវត្តសេចក្តីសំម្រេចដែលមានវិសាលភាពជាសកល ក៏មានសារៈសំខាន់ចំពោះសហគមន៍អ្នកធុរកិច្ចផងដែរ។ ម.ជ.ម. មានមោទនភាពក្នុងការណែនាំយន្តការមួយផ្សេងទៀតនៃការដោះស្រាយវិវាទក្រៅប្រព័ន្ធតុលាការ គឺយន្តការសន្ធានកម្ម។ សន្ធានកម្ម គឺដំណើរការមួយដោយមិនគិតពីពាក្យពេចន៍ដែលត្រូវបានប្រើប្រាស់ ឬមូលដ្ឋានដែលដំណើរការត្រូវបានអនុវត្តឡើយ ដែលក្នុងនោះគូភាគីព្យាយាមសម្រេចឱ្យបាននូវការសះជាដោយសន្តិវិធីលើវិវាទរបស់ពួកគេ ដោយមានជំនួយពីតតិយជនអព្យាក្រឹត្យ “សន្ធានការី” ។

ខ្ញុំអាចបញ្ជាក់ដោយមោទនភាពថា យន្តការដែលបានរៀបរាប់ខាងលើនេះ គឺមាននៅ ម.ជ.ម. ដែលអាចប្រៀបធៀបបានជាមួយសេវាមជ្ឈត្តកម្មរបស់ស្ថាប័នផ្សេងៗទៀត។ ម.ជ.ម. មានវិធានស្ដីពីសន្ធានកម្ម និងក្រុមការងារអគ្គលេខាធិការដ្ឋានដ៏សកម្ម និងមានសមត្ថភាពខ្ពស់។ ម.ជ.ម. បានធ្វើទំនើបកម្មគ្រឿងបរិក្ខារ និងការិយាល័យរបស់ខ្លួននាពេលថ្មីៗនេះ ដោយបានធ្វើការផ្លាស់ប្តូរទីតាំងទៅកាន់តំបន់ពាណិជ្ជកម្មដែលមានភាពជឿនលឿន និងមានកិត្យានុភាពបំផុតមួយនៅក្នុងប្រទេសកម្ពុជា។ សន្ធានការីដែលបានចុះបញ្ជីនៅ ម.ជ.ម. គឺត្រូវបានទទួលស្គាល់ពី Centre for Effective Dispute Resolution (CEDR) និងមានចំណេះដឹងស៊ីជម្រៅ ក៏ដូចជាជំនាញក្នុងការដោះស្រាយវិវាទពាណិជ្ជកម្មដោយប្រសិទ្ធភាព និងជួយភាគីវិវាទឱ្យឈានដល់ដំណោះស្រាយដែលមានផលប្រយោជន៍ទៅវិញទៅមក។

ម.ជ.ម. នឹងបន្តខិតខំប្រឹងប្រែងកសាងកេរ្តិ៍ឈ្មោះរបស់ខ្លួន ឱ្យក្លាយជាស្ថាប័នដ៏ទាក់ទាញមួយក្នុងការដោះស្រាយវិវាទ ដែលផ្តល់ជូននូវសេវាគ្រប់គ្រងសំណុំរឿងដ៏ល្អប្រសើរ ប្រកបដោយប្រសិទ្ធភាពខ្ពស់ និងមានភាពឆាប់រហ័ស។ ស្របពេលដែលវឌ្ឍនភាពជាច្រើនត្រូវបានសម្រេច មានកិច្ចការជាច្រើនទៀតដែលត្រូវធ្វើ ហើយខ្ញុំជឿជាក់ថាយើងនឹងទទួលបានជោគជ័យដោយមានការគាំទ្រពីអ្នកទាំងអស់គ្នា។ យើងឱ្យតម្លៃទៅលើការចូលរួមផ្តល់មតិយោបល់របស់អ្នក ហើយយើងពេញចិត្តធ្វើការជាមួយអ្នក ដើម្បីធ្វើឱ្យសេវាកម្មរបស់យើងកាន់តែប្រសើរឡើង សម្រាប់វឌ្ឍនភាពថ្មីរបស់ស្ថាប័នយើង។

ខ្ញុំសូមថ្លែងអំណរគុណចំពោះចំណាប់អារម្មណ៍ និងទំនុកចិត្តរបស់អ្នកមកលើ ម.ជ.ម. និងប្រទេសកម្ពុជា!